Friday, August 12, 2016

A secret letter to my secret pain

ഇതെന്റെ ഹൃദയം നിനക്കായ് എഴുതുന്ന ചോരയിൽ കുതിർന്ന വാക്കുകളാണ്

എന്റെ ജീവിതം പരാജയങ്ങളുടെ ഘോഷയാത്ര ആയിരുന്നു
അതിലെ അവസാന പരാജയം അത് നീ
നിറങ്ങളുടെ ഉത്സവം സ്വപ്നം കണ്ടവന്
കിട്ടിയത് കരിപുരണ്ട ഓർമ്മകൾ മാത്രം

ജനൽചില്ലിനപ്പുറം പ്രണയത്തിന്റെ മഞ്ഞു പൊഴിയുന്നു എന്ന് നീ പറഞ്ഞു
ഞാൻ കണ്ടതൊക്കെ വെയിലേറ്റു വാടിവീണ പൂക്കളാണ്
തൊടിയിലെ മരത്തിൽ കുയിൽ പാടുന്നു എന്ന് നീ
ഞാൻ കേട്ടത് ആരുടെയൊക്കെയോ പരിഹാസങ്ങൾ മാത്രം

ഞാൻ വിശ്വസിച്ചു നീ എന്നെ പ്രണയിക്കുന്നു
എന്റെ നിറം നിനക്കിഷ്ടമല്ല എന്ന് ഞാൻ ഓർത്തതുപോലുമില്ല
ഞാൻ കരുതി നമ്മൾ പ്രണയസല്ലാപത്തിൽ ആണെന്ന്
ഞാൻ നിനക്കൊരു തമാശ ആണെന്ന് അറിഞ്ഞില്ല

കറുപ്പും വെളുപ്പും രണ്ടു നിറങ്ങൾ തന്നെ
പകലും രാത്രിയും പോലെ പരസ്പരം അറിയാത്തവർ
പുച്ഛത്തോടെ എന്റെ മുഖത്തേക്ക് നോക്കരുത്
നിന്നെ ഹൃദയത്തിൽ നിറച്ചവന്റെ അപേക്ഷയാണ്