പവിഴമല്ലി പൂവ്

നീ പാരിജാതത്തെ കണ്ടിട്ടുണ്ടോ?
വെളുത്ത ഒരു കുഞ്ഞു പൂവ്
ഹൃദയത്തിൽ മാത്രം ചുവപ്പ് സൂക്ഷിക്കുന്ന,
സന്ധ്യക്ക്‌ മാത്രം വിരിയുന്ന
സുഗന്ധം പരത്തുന്ന പൂവ്
സത്യഭാമക്ക് വേണ്ടി കൃഷ്ണൻ
ദേവലോകത്ത്‌ നിന്നും കൊണ്ട് വന്ന പൂവ്
പണ്ട് അതിന്റെ നിറം ചുവപ്പായിരുന്നുവത്രേ
പിന്നെന്നോ കൃഷ്ണൻ സത്യഭാമയെ മറന്നപ്പോൾ
അതിന്റെ ചുവന്ന നിറം
ആ പൂവിന്റെ ഹൃദയത്തിൽ മാത്രം ഒതുങ്ങിപോയി
ഓരോ പവിഴമല്ലി പൂവും
സത്യഭാമയുടെ ഓർമകളാണ്